Boqorkii Sideedaad

                                                                                                       24/September/2016

Hooyaddii waxa ay ka soo jeeday dhalasho ahaan dadka Giriisiga (Greece) ee ku nool dalka Giriiga, waxaanu ku dhashay dalka Kanada, laakiinse, dhalasho ahaan waxa uu ka soo jeeday dadka Jerokee (Cherokee) ee ku nool dalka Jarmalka.

Waxaanu ka mid noqday Boqoraddii hore ee ka soo taliyey dalka Kanada (Canada), Boqorku waxa uu had iyo jeer dadkiisa kala hadli jiray goob fagaare ah oo aad u qurux badnayd kuna beernaayeen dhir iyo doog qurux-badan oo si fiican loo illaaliyey,  isla- wakhtigaas, khudbadihii halkaasi uu ka  jeedin jiray waxa ay ahaayeen murti iyo hadalo aadd u qiimo badnaa, laakiinse, haddana marka hadaladiisa ay wax ka qorayaan wariyayaasha iyo Qorayaasha reer Kanada, waxa ay ugu yeedhi jireen Boqorkii Sideedaad.

Taasoo ku abuurtay Boqorka in uu ka cadhoodo oo aanu raali ka noqon in loogu yeedho magac bixintaa loogu magac daray Boqorka sideedaad, waxaanay arrintaasi noqotay murankii ugu mudada dheeraa ee in badan soo jiitamayey, haddana wali taagnaa, marka la barbar dhigo Boqoraddii ka horeeyey.

Boqorku waxa uu ahaa hal-abuur  indheer-arrag, kaasoo qoray buuggaag badan oo ay ku duugnaayeen, Taariikheed nololeedkiisii, Gabayo, Dhacdooyin  iyo Sheekooyin gaagaaban, inkastoo uu lahaa laba sinjiyadood oo leh hal-dhaqan oo kaliya, laakiinse, haddana dhamaantood waxa laga dhan-dhansanayey labadiisa-hide ee uu ka soo jeeday.

Waxaanu ahaa indheer-garad fahamsanaa khatarta ay leedahay qoraaladda la xidhiidha mawduucyadda takooridda, sidoo kalena, waxa uu juhdi iyo dadaal badan galiyey faalooyin lagu duubay cajaladdo ku saabsanaa dadka Ameerikanka ah ee  Hooyooyinkood ay ka soo jeedaan sinjiyaddaha kale

Boqorku isagoo ka biyo diidsanaa dhalan rogga ku iminayey dhinaca sinjiyaddaha, waxa uu qaaday wakhtigaasi talaabo weyn oo uu u isticmaalay  awood ciidan oo dhinaca xuduudaha ah, waxaanu xilalkii ay hayeen ka qaaday dhamaan masuuliyiintii lahaa Labada-sinjiyadood, taasoo uu ku suureeyey in ay hallis ku ahayd nidaamka geedi socodka dalkiisa, sababtoo ah buu yidhi:-  Waa lagu soo dhex-mari karaa, taasina waa mid hallis ku ah jiritaanka qarannimadeena.

Waxaanu soo saaray sawiro muujinayey cadeymo badan iyo kuwo kale oo si far-shaxanimo leh oo ay ku dheehan tahay waayo-arragnimo, loogu xar-dhay Hooyo iyo wiilkeedii oo difaacaysa  aqoosiga dhiiga ay ka soo jeedo assalkeedii hore, taasoo lagu qabtay iyadoo socota dhulka lama degaanka ah ee u dhexeeya Kanada iyo Ameerika.

Haddaba, marka aynu eegno shaqsiyaadka u dhashay dalka Somaliland, laakiinse, haddana sita sinjiyaddaha kale, waa sida dhiig isku mulaaqmay oo kale, inkastoo ay jiraan dad aad u badan oo dhaqankoodu iyo diintooduba aanay is badelin qurba joogeena iyo kuwa haddeer tahriibka ku galay wadamada Aduunkaba, laakiinse, haddana, waxa hubaal ah in ay jiraan Lab iyo Dhadig, haba-yaraadaane ay guursadeen sinjiyaddo kale, halka kuwo kalena  ay ku dhaqan-doorsoomeen dhaqamadda kale duwan ee ka jira daafaha dunida.

Maaha tani mid ina tusinaysa  ama aynu ula jeedno sinjiyadda iyo dhiigaga isku mulaaqmay oo kaliye, laakiinse, waxa suura-gal ah in ay dhacdo wakhtiga fooda inagu soo haya, dadka ka imanaya qurbaha ee u dhashay dalkeena ee danaynaya in ay ka qayb-qaataan tartanka doorashada gollaha wakiiladda Somaliland, sannadaha soo socda aan loo warhaynin dhaqanadooda iyo diimaha ay haystaan midnaba, sababtoo ah, waxa ay u isitcmaali doonaan in ay lacag kaga iibsadaan dadka codadkooda iyo ta xisbiga ay musharaxa ka noqonayaanba,  si ay ugu guuleystaan  tartanka doorashada gollaha wakiiladda Somaliland.

Waxa kale oo ay taageero ka helli karaan deegaanada ay ka soo jeedaan beelahoodu, kuwaasoo  aan u lahayn wax-aqoon ah shaqsiyaadka ay codka siin doonaan waxa uu noqon doono, markaa, waxa muhiim ah inta la ogaan lahaa wakhti danbe oo xeedho iyo fandhaalba kala dhaceen, in aad la iska hubiyo dhamaan shaqsiyaada qurba jooga ah ee u tartamaya musharaxnimada xil-dhibaanadda gollaha wakiiladda iyo xil-dhibaanda gollaha deegaanka doorashooyinka soo socda ee ka qab-soomi doona Somaliland, haddii uu Alle ina gaadhsiiyo.

Ka sokow taasi, waxa iyana barbar socotay kuwo kale oo ku soo guryo noqday iyagoo qaba hamuun masseyr-xilleed ay ku doonayeen in ay xil ka qabtaan dalka Somaliland, ka dibna, loo dhiibay xilal  aanay waayo-arragnimo hore iyo aqoon badan u lahayn, nidaamka dowladnimo,  kuwaasoo wiiqay oo curyaamiyey dhamaan nidaamkii iyo habkii dowladnimo ee ka jiray Gollaha Fullinta iyo Gollaha Sharci Dajintaba.

Haddaba, miyaanay la gudbooneyn kuwa sinjiyadda kaliyaata haystaa, innay fiiro-dheer u yeeshaan arrimahan ka socda xayndaabka gayigan ay ku xeeran yihiin, kaasoo u baahan  halgan dheer iyo sharciyaddii lagu xakameyn lahaa arrimahaas oo dhan.

Maxamed Faarax Qoti